LETRAS GALEGAS 2016
Manuel María, o poeta da Terra Chá: "RENUNCIAR AO IDIOMA É SER MUDO E MORRER"
O mundo do deporte non permanecer alleo á sociedade da que forma parte e ten que estar presente no Día das Letras Galegas. Meréceo sobradamente o persoeiro homenaxeado este ano en Galicia, así que ...
Ares, 16 de maio de 2016.
... animémonos a ler a súa obra. Aquí, desde esta web do Numancia eleximos un poema do poeta de Outeiro de Rei, pertencente ao libro "As rúas do vento ceibe" no que amosa o seu compromiso coa lingua galega, coa súa cultura, co seu país:
A fala
O idioma é a chave
coa que abrimos o mundo:
o salouco máis feble,
o pensar máis profundo.
O idioma é a vida,
o coitelo da dor,
o murmurio do vento,
a palabra de amor.
O idioma é o tempo,
é a voz dos avós,
e ese breve ronsel
que deixaremos nós.
O idioma é un herdo,
patrimonio do pobo,
maxicamente vello,
eternamente novo.
O idioma é a patria,
a esencia máis nosa,
a creación común
meirande e poderosa.
O idioma é a forza
que nos xungue e sostén.
¡Se perdemos a fala
non seremos ninguén!
O idioma é o amor,
o latexo, a verdade,
a fonte da que agroma
a máis forte irmandade.
Renunciar ao idioma
é ser mudo e morrer.
¡Precisamos a lingua
se queremos vencer!
Fútbol e literatura son compatibles e velaí podemos ver ao chairego Manuel María no medio deste equipo de Monforte, vila onde viviu e traballou desde a década dos 60.