Os paus protagonistas do encontro.

Encontro correspondente a 7ª xornada de liga que no seu día tivose que suspender debido a un andazo de gripe entre os xogadores do Numancia.

Martes, 8 de decembro do 2009.

7ª Xornada, categoría cadete, 2ª autonómica, grupo 4º.
PORTUARIOS B, 2 – NUMANCIA, 0.

Alineacións:
PORTUARIOS: Xavier, Javier, Alejo (Ismael min. 58), David Cordero, Rafael, Esteban, Miguel, Iván (David Rodríguez min. 45), David Vilasánchez (Iago min. 41), Manuel (Cristián min. 57) e Adrián Planas.
NUMANCIA: Carlos, Xaime (Martín min. 41), Pepe, Ángel, Roque (Andrés min. 48), Quique, Ricardo (Miguelito min. 59), David (Antonio min. 41), Alberto (Javi min. 41), Edu e Miguel López.

COLEXIADO: José Luís Corral Franco.

CARTÓNS:
Recibiron cartón amarelo Esteban e Adrián Planas (dous cartóns) polo Portuarios e Miguel López polo Numancia.

COMENTARIO:
Espectáculo bochornoso o que ofreceron na primeira metade os aresás, apenas pasaron de mediocampo e soamente chegaron en dúas ocasións, unha ao comezo e outra ao final, á portería contraría. Incapaces de enlazar unha soa xogada, pasaron moitísimos apuros para desembarazarse dun Portuarios, tamén desordenado, pero con máis ímpeto, máis forza, peleón e mentalizado, que desde o asubío inicial xa saíu a gañar o partido, desbordando a un Numancia que non deu entrado en xogo. O centro do campo do equipo visitante brillou pola súa ausencia e os ferroláns xogaron a pracer creando moitas, excesivas, ocasións de gol que só a fortuna e San Carlos impediron que se materializasen.
Na segunda metade, volveu ese “Numancia das segundas metades” ao que os que asistimos asiduamente aos partidos xa nos afixemos. Xogando con tres infantís, un deles de primeiro ano “Martín”, que foi un dos máis destacados do equipo, xunto con Pepe e Carlos “San Carlos”, que a pesar do agasallo de Nadal que lle fixo ao contrario, non empaña en absoluto o resto da sua labor. Foron capaces de maquillar o encontro creando bastantes máis ocasións de gol que o contrario, pero a fortuna non lles sorriu. Ata en tres ocasións o balón bicou os paus, estaba claro que non era a tarde dos de Ares. Polo menos deron unha boa imaxe nesta segunda metade e mereceron o premio do gol da honra que non se materializou. Non queda máis que felicitar ao Portuarios polos tres puntos colleitados, a súa garra, o seu ímpeto e o espírito gañador co que saíron ao terreo de xogo, foron as claves para conseguilos.

MINUTO A MINUTO:
1ª METADE:
M 2: balón que rouba Miguel López nos tres cuartos, penétra na área local e pase da morte que non atopa rematador.
M 9: centro-chute do Portuarios desde a banda dereita que remata David a bocaxarro e Carlos detén de espectacular parada.
M 20: xogada do Portuarios pola banda dereita, centro ao área e mal despexe de Xaime que deixa o balón morto nos pés de David, o seu remate é de novo detido por Carlos.
M 24: centro de Adrián Planas ao área, Iván remata de cabeza e o seu disparo sae por encima do traveseiro.
M 30: despexe da defensa do Portuarios en longo, Anxo controla no mediocampo propio e ao darse media volta para atrasar ao gardameta, tropeza e cae deixando o esférico nos pés de Iván, que encara a porta numantina. Prácticamente ao bordo da área Carlos detén en primeira instancia tirándose aos pés do dianteiro, que sae favorecido do rexeite, pero o seu disparo é salvado baixo os paus por Pepe.
M 33: nova internada do Portuarios na área aresá que Carlos desbarata tirándose aos pés de Miguel.
M 39: pase en profundidade de Quique, ás costas dos defensas, sobre Edu, quen controla e encara a porta local. Lixeiramente escorado á esquerda, salva a saída de Xavier ao que supera de vaselina pero o balón sae por encima da portería.
M 43: libre directo do Portuarios no pico da área, logo de varios rexeites o balón cae no semicírculo exterior e é rematado por Miguel, Carlos envía a corner con bastantes apuros.
M 46: saque de esquina do Portuarios e Adrián Planas de cabeza envía ao fondo das mallas, 1 - 0.

2ª METADE:
M 2: saque de banda dos aresás sobre Edu que chega case á liña de fondo, o seu centro chute sae envelenado e toca no traveseiro.
M 7: agasallo de Nadal do Numancia, balón colgado de Adrián Planas desde o círculo central sobre a área numantina, Carlos dubida na súa saída e Miguel toca o suficiente para roubarlle a carteira ao gardameta aresán e marcar a porta baleira, 2 - 0.
M 19.- arrancada por velocidade de Miguel López pola banda dereita alcanza a liña de fondo xa dentro da área e nun man a man con Xavier perde unha gran ocasión de gol.
M 20: Carlos bota unha falta no círculo central que colga na área do Portuarios, o balón rexeitado pola defensa local é rematado por Miguelito pero o seu disparo sae por encima do traveseiro.
M 22: balón colgado polo Portuarios na área aresá que Carlos despexa a duras penas, o esférico cae morto no pico da área pequena e Adrián Planas de forte disparo estrélao na cruceta.
M 30: xogada de Edu pola banda esquerda, cerca do pico da área crúzaselle Miguel López que lle saca o balón dos pés, sen pensarllo dispara a porta e o esférico márchase fora rozando a base do pau.
M 39: libre directo que lanza Martín próximo ao pico da área local pero o seu disparo estrélase no traveseiro e vaise fóra.
M 42: saque de esquina de Quique que remata Edu de bolea e de novo o balón ao traveseiro.