GOLES, HOMENAXES E FENOMENAL AMBIENTE NO IV TROFEO FESTAS DE SAN ROQUE
O GALICIA DE MUGARDOS LEVOUSE O TROFEO, NUN PARTIDO NO QUE CARLA VILASÁNCHEZ FIXO O SAQUE DE HONRA.
Partido celebrado ante mais de 300 espectadores que con motivo do IV TROFEO FESTAS DE SAN ROQUE, acudiron a Prados Vellos a presenciar un encontro de pretemporada entre o Numancia de Ares e o Galicia de Mugardos. Antes do inicio do mesmo, a triple campiona de España de ximnasia rítmica, a aresá Carla Vilasánchez, foi homenaxeada polo noso club e pola Comisión de Festas de San Roque. A nosa presidenta Elena Fuentes agasallou a Carla cunha camiseta de "Eu son Numan" e cunha bufanda da entidade. Pola sua parte, Luís Fuentes en representación da Comisión de Festas de San Roque entregoulle a ximnasta aresá un ramo de flores. Posteriormente, Carla Vilasánchez Fernández realizou o saque de honra e posou xunto aos componenes dos dous equipos.
FICHA TÉCNICA:
NUMANCIA: Kike, Antón, Vicente, Berto, Amenedo, Marcelo, Fran Ripas, Iván Pivo, Dani Espiñeira, Rubén e Alex Pita. Tamén xogaron: Óscar, Pablo Ferro, Elías, Martín, Julio, Joaquín e Chapu.
Adestrador: Miguel Carballeira
Delegado: José Antón
G. MUGARDOS: Ángel, Bruno, Adrián, Termi, Jorge, Jorge Nano, Diego Chis, Dani Ramos, Josiño, Artai e Nes. Tamén xogaron: Jorge López, Marcos, Alex e Ponce.
Adestrador: Jose Luís Fontao
Delegado: Colás Barcia
CRÓNICA:
Na primeira metade, un Galicia con mais rodaxe nas suas pernas imprimiu un ritmo alto de partido. O Numancia foi quen de dar a cara nos primeiros 45 minutos, aínda que os visitantes chegaban algunha vez a porta ben defendia por Kike. No minuto 35, o capitán mugardés, Adrián Martínez conseguía o 0-1 aproveitando o rexeitamento dun saque de esquina. Con ese resultado chegábase ao descanso.
Na segunda parte, os trocos nos dous equipos abriron o partido. Vimos oportunidades nas dúas porterías. Anotaba o Galicia o 0-2 no minuto 55 ao transformar Nes un claro penalti cometido por Marcelo. O Numancia non lle perdeu a cara ao encontro e Chapu cunha fermosa volea tras unha asistencia de Elías facía o 1-2 no minuto 65. No tramo final do encontro, os numantinos tiveron ocasións para empatar e os de Mehá para matar o partido á contra. Non se moveu o marcador, e o IV Trofeo Festas de San Roque marchou para A Pedreira.
Unha vez finalizado ó partido, Luís Fuentes e Beatriz López, en representación da Comisión de Festas de San Roque entregaron os respectivos trofeos aos dous equipos. Dende o Numancia de Ares agradecemos a Comisión de Festas de San Roque por seguir un ano mais colaborado coa nosa entidade e ao Galicia de Mugardos por vir a xogar con nos estre trofeo por terceiro ano consecutivo.
Os nosos seguirán co traballo de pretemporada, adestrando esta semana o luns e o xoves para preparar o Trofeo Concello de Ares que terá lugar o domingo ás 19:00 en Prados Vellos no que o Numancia recibirá a outro equipo da Primeira Galicia, o Cultural Maniños SD.
¡¡¡AUPA NUMANCIA¡¡¡
Acceso á Galería Fotográfica do encontro.